Дээвэр ба интерьер
Барилга МН
2019-11-05
Эрхэм хүндэт уншигчид аа, хамтдаа зураг уншицгаая. Зураг уншиж, тэр л төсөөллөө амьдралд буулгаж болох боломжийг бий болгоцгооё. Бидний унших эхний зураг бол дээрхи "Дээвэр ба интерьер дизайн" - ны өгүүлэмж бүхий зураг юм.
Энэхүү цэвэрхэн, цэгцтэй хийц бүхий өрөөний зохион байгуулалтын хамгийн гол хэсэг бол дээвэр дээр шууд хийгдсэн том цонх юм. Энэ цонх нь бидний зуслангийн болон бусад амины орон сууцны байшинд нилээдгүй шинэ орон зай үүсгэх боломж гэдгийг нэн түрүүн анхаарах хэрэгтэй. Хойшоо Хандгайт руу гараад явуут л угтах үй түмэн байшингийн ихэнхийнх нь дээврийн хөндийнүүд нь тусдаа өөрийн гэсэн хоосон зай бүхий, ашиггүй талбайг бий болгосон байдаг. Харин бидэнд энэхүү дээврийн хөндийн дизайн, интерьер төрхийг ажиглан уншсанаар шинэ шинэ боломжууд дүүрэн бий гэдгийг мэдэж авах боломжтой.
Цонх амьдралын гэрэл гэгээг таны гэрт тусгагч ...
Энэхүү цонхны хувьд хэмжээ ба дизайн ямар ч байж болох хийгээд таны төсөөлөл, хүслийн бүрэн мэдэлд байна. Байшингийн хананы дээд ирмэг хэсэгт жижиг цонх нь байрлаж, дээвэр рүү үргэлжилсэн налууд хэвтээ цонх байрласан байгааг анхаарах хэрэгтэй. Хэрвээ бид ийм цонх бүхий дээвэртэй болохыг хүсвэл анхаарах зүйл гэвэл дээвэрт тохирох ус чийг, дулааны хамгаалалттай зориулалтын цонхыг нь сонгох хэрэгтэй. Мөн энэхүү хийцийн цонхонд аль болох Герман модон вакуум цонх илүү үзэмжтэй байж болохыг санал болгож байна.
Дээвэр ба цонхны хийцийн дараачийн олгох боломжууд бол дээд давхрын өрөөг улам цэлгэр болгож буй явдал юм. Энэ өрөө нь таны хүүхдийн өрөө байхад илүү тохиромжтой бөгөөд ажлын өрөө, эсхүл номын сан байхад ч мөн тун догь нийцэх вий.
Өрөөний интерьер шийдлийн хувьд та тухайн өрөөгөө ямар өрөө болгохоор шийдсэнээс шалтгаалах нь мэдээж. Ажлын өрөөний хувьд бол нэг өнгийн, цайвар тод хана туургыг сонгох нь оновчтой байх ба цонхоор үргэлжид тусах нар таны өрөөг бүхэлд нь гэрэлтүүлэх ба шөнөдөө ч саруул орчинг бий болгосноор ажлын их ядаргаанаас тань нэлээдгүй нимгэлэх нь лавтай.
Хүүхдийн өрөөндөө энэхүү дээвэр ба цонхны шийдлийг сонгосноор таны хүүхэд гэгээлэг хүмүүжил, сэтгэл санаа нь цэвэр гэгээн хүсэл эрмэлзлэлийг олох нь гарцаагүй юм. Нарны гэрэл хэдий чинээ тусч, саруул цэлгэр байна, төдий чинээ амьдралын сайхан руу тэмүүлдэгийг гэр бүлийн сэтгэл зүйчид нэн түрүүнд өгүүлдэг юм. Дээвэр дэх цонхны дор хүүхдийн орыг байрлуулахыг санал болгож байна. Магадгүй та хүүхдээ унтахад нь үлгэр уншиж өгдөг бол хүүхэд тань дээр түгэх түм буман оддыг ширтэн үлгэр, хүсэл мөрөөдөл, ургуулан бодох чадвартаа бүүвэйлэгдэн сайхан нойрсож өглөөг цовоо сэргэлэн угтах болно гэдэгт итгэлтэй байна. Гэр бүлийн аз жаргалыг амьдрал гэж хэлэхэд буруудахгүй болов уу.
Амраг хайрт, залуу хосуудад
Бидний уншиж буй зургаас бас нэгэн өгүүлэмжийг уншиж болох ба тэр бол унтлагын өрөө юм. Энэхүү дээвэр дэх цонхыг арай өргөн, томоор дээвэртээ суулгаад, яг эгц дор нь унтаж амрах том гэгчийн ор байрлуулаад та нэг төсөөлдөө. Өглөө сэрмэгц л намрын навчис цонхон дээр чинь хаялж, хайртай хүн чинь дэргэд тань унтаж байх мөчийг. Эсхүл хүсэл оргилсон шөнө таны дээхнэ шивэрч буй бороог .., энэ талаарх төсөөлөл бол таны хувийн өмч шүү.
Сүүлийн үед манайд нэлээдгүй нэвтрэх болсон "Хаус Парти" -д ч уг дээврийн өрөө маш тохилог, өөрийн гэсэн донжийг илтгэсэн сайхан байрлал байх болно. Шинэ жилийн үдшээ найз нөхөд, гэр бүлээрээ зусландаа гарч өнгөрөөхөд зургаан мичид, цан хүүргийн хамтаар орой дээр тань гялтагнаад хичнээн үзэсгэлэнтэй байх бол оо?
Тавилга ба түүний эргэн тойронд
Бидний санал болгож буй дээрх зурганд дээвэр хана хоёрын зааг бүхий зайд буйдан байрлуулсан байгаа нь сонгодог шийдэл байж болох бөгөөд явган ба том ширээн дээрх цэцэг бас санаа авууштай зүйл юм. Таримал цэцгээс гадна ганган, хээнцэр хийц бүхий цэцгийн шилэн хоргонд сараана, гоодаль, вансэмбэрүү, сарнай, башир, алтанзул гээд маш олон төрлийн цэцэг өрөөг илүү "амьдруулна". Сайхан ч үнэртэй болгоно. Явган ширээний доод тавиур, буйдангийн нэг өнцөг дээр бас шинэ шинэ монгол сэтгүүл байх нь таны төсөөлөлд хувь нэмрээ оруулна гэдэгт итгэлтэй байна. Бусдыг нь таны амьдралын хэв маяг мэдэх билээ.
Дээвэр, Interior, Exterior, Landshaft. Энэ бол нэгэн цогц шийдэл
Тус дээврийн налуу цонх бүхий шийдэл бол гадаад дотоод засал чимэглэл, байшингийн ойр орчимд бүхэлд нь дажгүй зохицож чадах шийдэл юм. Гадна талаасаа үзэмжтэй ба өвөрмөц хийцтэй байх болно.
Хэрвээ та ийм дээврийн налуу цонх бүхий байшинтай болохыг хүсвэл Монголдоо дээвэр угсралтаар гаргуунд тооцогдох Монвудын мэргэжилтнүүд танд бусад хэрэгтэйг нь хэлээд өгнө шүү.